Miðstöð byltingarinnar

Óvissa um landsmót hestamanna

Valur — Tue, 25 May 2010 13:50:42 +0000

Svakalegar þessar fréttir um að landsmóti hestamanna verði jafnvel aflýst, vegna kvefs og nefrennslis hjá hrossunum.

Heyrst hefur að ÁTVR muni senda frá sér afkomuviðvörun…

Kínversk speki?

Valur — Wed, 12 May 2010 08:49:27 +0000

“Enginn er svo lítill að hann geti ekki teygt úr sér.”

Þetta poppaði upp í hausinn á mér í gær. Veit ekki hvort ég las þetta einhvers staðar eða hvort þetta er einhver aukamylsna úr eigin kvörnum, sem voru á fullu í gær að mylja efni í síðustu ritgerðina.

Þetta hljómar eins og “kínversk speki” eða eitthvað í þá veruna. Leitarvélar Alnetsins virðast samt ekki kannast við þetta máltæki. Spurning hvort annar hvor lesandi síðunnar gæti varpað ljósi á málið?

Ljóð

Valur — Fri, 16 Apr 2010 17:36:37 +0000

Ást er…

Ég geri mér ferð
úr sjónvarpssófanum
fram í eldhús
til þess að

klípa hana í rassinn.

Svo (lengi) lærir sem lifir

Valur — Wed, 24 Feb 2010 09:17:03 +0000

Ég sé að síðustu færslur fjalla óþarflega mikið um snjó. Mér er ekki um snjó gefið og kannski betra að beina skrifunum að öðru.

Til dæmis er skemmtilegt frá því að segja að ég er nýbúinn að læra að afhýða banana að hætti apa og finnst sú aðferð miklu sniðugri en sú gamla. Ég er samt ekki viss um hvort það er þroskamerki.

Konudagurinn að baki

Valur — Wed, 24 Feb 2010 09:08:52 +0000

Ég hef stundum gaukað einhverju lítilræði að sambýliskonunni á konudaginn svokallaða. Ekki oft þó. Nú hefur hún hins vegar fengið glaðning tvö ár í röð. Í fyrra seldi talsmaður íþróttafélags mér þá hugmynd að léti ég hann fá peninga þá myndi einhver íþróttagæi banka upp á að morgni konudags og færa konunni minni blómvönd. Sumum gæti fundist að hinn raunverulegi gefandi væri óþarflega smátt númer í svona jöfnu en frúin virtist hins vegar í sjöunda himni þegar hún fékk blómin. Skil það nú ekki alveg, sjálfum fannst mér vöndurinn frekar rytjulegur.

Þetta árið var ég hins vegar grand á því og fjárfesti í sterklegri og gljáfægðri snjóskóflu úr vönduðu áli handa frúnni. Alveg nýjasta módel, keypt í dýrri sérverslun. Konur fíla svoleiðis. Hún varð auðvitað alveg himinlifandi og fór strax alsæl út að moka, þó að hún hafi reyndar verið búin að hjakka með gömlu beyglunni og taka það mesta. Nú héldu henni hins vegar engin bönd og það var unun að fylgast með tilþrifunum út um gluggann. Og eins og þeir vita sem fylgjast með þá er meira en nægur snjór á Akureyri, handa öllum þeim sem eru gefnir fyrir mokstur.

Ekki spillti fyrir að hún var svo spræk eftir moksturinn að hún skellti í vöfflur með kaffinu og hafði líka keypt þessa fínu tertu. Þannig að þetta var alveg ljómandi konudagur.